நெஸ்லே லங்கா நிறுவனத்தின் அனுசரணையுடன் யாழ் உதைபந்தாட்ட சம்மேளனத்தால் நடாத்தப்பட்ட உதைபந்து போட்டி - டயமன்ஸ் வி.கழகம் வெற்றி

நெஸ்லே லங்கா நிறுவனத்தின் அனுசரணையுடன் யாழ் உதைபந்தாட்ட சம்மேளனம் நடாத்தும் மாவட்ட ரீதியிலான மைலோ கிண்ண உதைபந்தாட்ட சுற்றுபோட்டியில், தெரிவு செய்யப்பட்ட சிறந்த முன்னணி கழகங்கள் மோதும் உதைபந்தாட்ட சுற்றுப்போட்டியானது, இன்று நடைபெற்றது.

 

வடமாரட்சி அணி சார்பாக  தலை சிறந்த 12 அணிகள் மோதவுள்ளன. இதில் சார்பாக வல்வை, டயமன்ஸ், பொமேர்ஸ், விண்மீன், நவஜீவன்ஸ், சென்அன்ரனீஸ், கலைமதி, கொலின்ஸ், சென்சேவியர், யங்கம்பன்ஸ், இமையாணன், உடுப்பிட்டியூத் ஆகிய அணிகள் மைலோ கிண்ணத்துக்காக தெரிவு செய்யப்பட்டுள்ளன.

 

இச்சுற்று போட்டியானது இன்று இமையாணன் விளையாட்டுக்கழக மைதானத்தில் நடைபெற்றது. வடமாரட்சியில் தெரிவு செய்யப்பட்ட 12 அணி வீரர்களும் இன்றைய நிகழ்வில் கலந்து கொண்டார்கள். நிகழ்வின் ஆரம்பத்தில் விருந்தினர்கள் புறா பொறுக்கி சந்தியிலிருந்து பாடசாலை மாணவிகளின் அணிவகுப்பு மற்றும் பாண்ட் வாத்திய அணி வகுப்புடன் மைதானத்திற்கு அழைத்துவரப்பட்டார்கள்.

 

அதனைத்தொடர்ந்து விருந்தினர்கள் 12 கழக வீரர்களுக்கு கை கொடுத்து வரவேற்று போட்டியை ஆரம்பித்து வைத்தார்கள்.

 

இன்று நடைபெற்ற போட்டியில் கம்பர்மலை யங்கம்பன்ஸ் விளையாட்டுக்கழகத்தை எதிர்த்து வதிரி  டயமன்ஸ் விளையாட்டுக்கழகம் மோதியது. இந்த ஆட்டம் முடியும் வரை இரு அணிகளும் தலா 3 கோல்களை பெற்றமையால், நடுவர்களினால் தண்ட உதை வழங்கப்பட்டது. தண்ட உதை மூலம் வதிரி  டயமன்ஸ் விளையாட்டுக்கழகம் வெற்றி பெற்றது.

 

நாளை வல்வை விளையாட்டுக்கழகம் மோதவுள்ளது .